Dan an arzan

Na in kou, Tikok i ariv ek son monmon, li di :

« Monmon ! Moin na dé dan i bouz dan mon bous !

– Ousa ou na dé dan i bouz, mon zanfan ?

– Dan mon bous, monmon ! »

Madanm Biganbé i rir minm, apréla li di :

« Rézman pou ou lé dan ot bous, mon zanfan ! Sansa, mi oi pa koman noré débrouyé ! »…

Zan-Lik la antand la konversasion, li di Tikok :

« Vien, m’a aras out dan !

– A ouè ! Tikok i réponn. Ou lé fou ?

– I fémal pa, sa, koulou ! Zan-Lik i arvir. Kontrèr ! Kan ou sar fine arasé, ou i mèt lo dan desou in rosh, épila domin matin, ou i argard desou lo ros, ou i trouv… larzan ! »

Tikok la lès son frèr aras inn dan ; apréla zot dé la parti dépoz sa desou in ros, koté lo pié zak. Landmin matin, Tikok la trouv larzan po toulbon. A la plas : navé di fran !

Konm Tikok la vi lété pa mantèr, li la ras l’ot dan, épila, san di personn rien, li la parti kasièt lo zafèr desou lo minm rosh. Soman, landmin matin, kan li la parti rann ali kont, oki d’ larzan ! Lo pti siko-d’dan lété bien an plas, mé-soman lavé pa produi ! E Tikok lété kit po dé dan an moins ek in gran baro simtir… dann son bous !

Christian Fontaine