Dë rogar pa parèye d’in rényoné dsi Moriss é dsi La Rényon.

Mé m’a dir azot in n’afèr mwin la pwin lo mèm rogar dsi sak banna i amontr labaa é dsi sak bann télé i amontr issi. Zot va dir amwin kan i transformin léguime sansa in frui laba, lé konm kan i transform in léguime sansa in frui issi.Mi diré laba konm issi le moune néna bann zidé zényal bin alor pou kossa mi di mwin na pwin lo mèm rogar rante sak i fé laba épi sak i fé issi ?

Sinploman pars pou mwin kan i anparl bann zinissyativ dévlopman laba Maurice mi rossan sa konmsi nou lé dann in dévlopman la réissi é va réissi plizanpliss é la diminyé lo shomaj épi l’amenn la popilassion dann in sèrtin nivo d’vi par lo dévlopman lo péi.Alon pa obliye bann Morissien néna par zot prop aktivité ékonomik lo promyé nivo d’vi an parmi bann péi l’Afrik.

Kan mi rogarde bann zinissyativ dévlopman i amontre dann télé pou La Rényon, mi di pa sak i amontr é sak néna bann zinissyativ zot mèm zot i réissi ar pa mé si zot i réissi zot sar dan lo ka d’ in réissite individyèl pa dann lo ka d’in dévlopman zénéral donk d’in réissite koléktiv. La politik bann transfèr k’i fé noute nivo d’vi mé dann lo transfèr larzan i ariv épi li ropar san fé d’pti sir plass.

Wala sak i fé ké ni koz bonpé dévlopman issi La Rényon san fé é bann Moris i koz pa solman zot i fé.

A bon antandèr salu !

Justin