Kan in kréol jényal i apèl Christian Fontaine i ésplik kossa i lé « son zistoir Tikok » : morso niméro inn

Konm tout lé sominn, té falé in nafèr pou di, moin té anvoye konm l’arivé. Défoi té sort ti zistoir po fé ri, i roprézant in pé in nti marmay dann son vi pti plantèr-la dan son nti lantouraz li koné rienk kann, zèrnyom épi lo zé ; zoué bité, zoué kanet, tousala. Epi li artonm dan lékol, in gran lékol, tou zafèr ladministrasion i ansèrv in ta gran mo, in ta sési, in ta séla, : li lé in pé pèrdi. Alor, ou rakont sa, i artonm konm in n’afèr i fé ri,, konm zédmo, malantandi, tousa… Ou bien ou i rakont in Tikok i sar dan in biro, banna i koz gro fransé, ali li konpran pa : la osi i artonm parèy. Si in sans, i fé ri in nti pé soman lo fon minm, kan ou rogard, dizon sé inn ti séri zistoir, ki artonm konm in pti « listoir » si ou i vé konm Larénion néna zistoir : zistoir Tizan, zistoir Grandiab, lézann madam Débasin i ropoz dsi listoir madam Débasin. La ossi dann Tikok, sé in séri ti zistoir, mé dann tousa na konm in gatir i anmar tousa ansanm i fé konm in « listoir Tikok »

Listoir Tikok : la vi in nti marmay i avans dousman dan la vi i dékouv la vi granmoun, la vi osi ozalantour konm la vi la vil, la vi lékol. Ladan, li réazi konm li lé, sétadir in zanfan ti plantèr i koné la mizèr i ral lo diab par la ké tousa. Li ossi, dan son nti tète, li kalkil, li mazine koman li pé fé kéksoz pou sanz la sityassion. Son kèr i fémal oir tout son bann kamarad dan la sloufrans, dan la doulèr, alor k’in ta dmoune i koné pi kossa i fo fé avèk larzan. Tèt pa larzan i fé lo bonèr, si ou i vé, bé la bézoin in nti pé, épi li rod d’ot soz pou k’demoun i viv myé ksa.

Promyé morso lé fini sé in kozman Christian fontaine i di, dann son rol Manièl Robninet dsi radio pikan (lémision kriké kabaré)