Lindi 5 mars (Premié boute)

Pa-sito nou la-fine assize – anou garson : bann fiy lé mèm pokor là – inn bon plui cé-d’ komanse tonbé. Détroi gro-gro grin fané pou komansé. Soman, vittman vittman, grin-là i akost’ inn kontre l’ot, i férme lo temps : alala lavalasse ! Lo sièl depi gran matin té pou ramassé, astèr i largue toute delo antassé.

Toudinkou : loraz ! In pétaz la mine ! In grongnman Grandiab ! Tèlman lé for, li fé tranbl’ la sarpante, daoir ossi li fé grêne moulal (1) dann farfar, i fé shape boukané dan la sann, i débranshe pié fouyapin.

Dan nout kantine, la gayardiz i roule boranbor. Kamarade i pétiye la-joie plüs for k’ ver-d’ shiasse ke lé pou bingne dann de-lé sikré. La boush toute bann’a lé fandü en transh papaïy. Lo rir i grêne dessou loraz. Inn i farse, l’ot i plézante. Rémon i kriye (li amontr’ lo sièl sanm son doigt) :

– Lo vieu lé po moule son mayi la-o.

– Kèl moule mayi, Mano i arvire. Lé po pété, oui.

Ce léspesse malfondé i ashéve

– Lodeur i tarde arpa pou levé, là !

La gaieté i ranpli la kantine, mé soman, dessou la tab tréto, Titone – gran Titone-là ! – i rakokiye son corps parèy dann ventr’ son monmon, i plère konm baba tann en moil. Rémon i ésplike :

– Depu l’heur k’ siklone la-lève sa kaz, la-palanke dann bor d’ ravine, lu lé konmsa mèm. Deux z’heur d’ temps son papa la-rode alu dann karo kanne – épula, asteur, si la plüi i menasse sinpleman, lu pète à pleuré.

E la plui i ménasse pa sinpleman zordi : i atake à krazé, i grêne, i déboule, i saboule. Lo sièl i shape par boute. In lavalézon (2) konm ça-là lé pa pou arète koméla : néna ankor avan k’ Bondié i fèrme robiné ! Toute fasson, çak lé déor lé fine tranpé en shien mouyé. Inpérméabe-aou, golaz (3) -aou – ajijé gran fèy fig, sansa gouni – néna poin rien pou anpare in shaboulaz de-lo konmsa-là.

Dan kèl degré mon pov Lina sar randi ?

Axel Gauvin

(1) suie

(2) In sharjman d’plüi.

(3) Gran « parapluie » lontan.