Lo mal lapin d’Héctor la fé d’ti.

Nou té dakor avèk noute papa pars si l’avé in konéssèr dan la kaz sété li.Li la pran in gran déssikzyon ?Li la di : « Mi sava oir mon kamarade Hector, li va anprète amwin in mal lapin.Sé konmsa k’in soir, dann in tante vakoa noute papa l’amenn lo mal lapin an késtyon épi li la mète sa dann noute garène ?Aprésa la vi la suiv son kour mé pa lontan.

Pars ladomin soir kan nou la sorte lékol Sin-Dni lété lo branl-ba d’konba.Papa té pa la é noute momon mètrèss lékol lété bien annuiyé avèk sète afèr d’lapin.Inn dan la bann la fé d’ti é lo pli ékssité lété lo mal d’Hector.Li la shapé épi li la parti kashyète anlèr dann toi magazin dsi bann gran pyèss doboi…Pa sito nou néna in frèr la mète l’otèr dsi nou pars nou té i amenn arienk soussi pou noute momon.

Noute papa l’arivé téi fé prèss noir é li la parti trape lo mal d’Hector pars momon l’avé déklaré : « Papa mon anfan. » Lo mal d’Hector la fé d’ti ! Papa téi kroi pa in n’afèr konmsa lété possib pars d’apré li é lo propriyétèr lo mal té in mal in poin sé tou. Momon l’avé tir bann pti é papa la armète azot dann park é inn rante lé dé noir la komanss okipe bann pti konmsi lété son projénitir. Donk nou la dékrète té in fémèl.

Lo mal d’Hector la fé l’alé rotour é noute papa la romète lo zanimo son propriyétr è… Mé l’afèr i arète pa la … nou l’avé de lapin é inn lété in mal é l’ote in fémèl mé lakèl dé dé ? Sa ni koné pa. Mé atanssion kékjour apré inn an parmi lé dé la mète ba.L été pa sèk l’avé mète ba promyé kou, té l’ote d’apré nou. Donk nou l’avé dé lapin, lé dé mal épi fémèl.

Alé débarbote aou ladan !