Manir viv bann Biganbé

Bann Biganbé-la i roul zot ti mizèr konm sa minm ! Zot ti bout la tèr-la, zot i travay sa an respé ! Do-boi nana, in grin piman nana, in pongné zerb i trouv vitman. Patat, maniok tou-sa-la i pous, i dépane azot kan na-pi larzan po asèt tourto* po koson. Anfin, i fo dir banna i roganiz bien zot bitasion po pa k’ i mank azot in nafèr.

Banna i manz dori inn foi l’tan. Apark-sa, zot i manz maï tou-lé-zour. Zot i fé moune sa. Dann maï mouli-la, i tir ti-maï po fé soso, maï po manzé, lo son po koson. Tazantan, i fé in gato lanmsim*. Dizon, zot i manz sak zot i plant !

Lontan, zot té i plant zernionm. Soman, navé poin n’ garanti, té in nafèr té pa asiré. L’ariv in zour, la di azot aras tout, plant pi : lésans i vann pi, la Frans ek péi déor i asét pi ! Po le kann, sar parèy. Alors, bann Biganbé i profèr plant po manzé, songn inn-dé zanimo. Sét-ané, somanké lo granmoun i sa esèy in nti karo dori po oir koué i donn.