Pandann tan-la kabri i manz salade

Macron lé prézidan dopi sètan. Avan li méssyé Hollande la fé sinkan san rézilta signifikatif pou nou. Avan Hollande l’avé Sarkozy é si mi rapèl bann komantèr Paul Vergès la fé dann tan-la son bilan lété pa si mové ké sa sirtou pars li l’avé pouss in pé pli loin ké lé zot la konprenire bann péi l’outre-mèr épi lo méyèr shomin pou nou avanss bien konm k’i fo.

Nou kominiss rényoné ni konpran bien i fo pa ni lèss noute zintéré dan la min bann zinstitission parizyène. San fèr lo fyèr ni konpran bien sé nou ki pé oryante noute lékonomi, noute sossyété, nout kiltir épi noute lanvironeman dann in méyèr sanss épi in méyèr dirékssion avèk in plan fé par bann rényoné pou bann rényoné…

Maurice Gironcel la fine anparl sa, Elie Hoarau galman épi toute bann militan kominiss rényoné avèk bann résponsab. Mwin pèrsonèlman mi oi sa tré bien konm in plan ropri par in loi-kade pou permète anou prann shomin in vré dévlopman.

Antanssion lé déza tar, pétète pa tro tar, mé kante mèm mi panss nou la fine pèrde in bonpé d’tan é nou l’apré rante dann in pèryode mi panss pa la Rényon va trouv dann toute domenn lo bann dirékssion k’i fo pou nou mète anou dann shomin in vré dévlopman — dizon ké ni rotrouv la route trassé par Paul Vergès é k’téi doi amenn anou a bon por. Dann la voi in vré dévlopman.

A bon antandèr salu.

Justin