« Zanfan-la shové lé mayé ! »

Médam zé méssyé, la sossyété koz èk mwin sé koz èk in kouyon mé sé o pyé d’lo mir k’i oi lo masson.

Shové amayé zot i koné, sa i ariv bonpé zanfan issi la Rényon. In pé va di zot i mète sizo ladan épi lo problèm lé réglé mé sak i oi ladan konm in lintervanssyon sirnatirèl zamé zot i sava pa koupe bann ti bouklete-la par zot mèm pars zot la pèr sa i porte movèz shanss lo marmaye.

In pé i sèye démayé kou d’pingn mé lo mayaz i arvien toutsuit konm pou amontre azot i fo fèr in ka avèk sa. Sa i fo pran o sèryé.

In zour mwin la trouv in madam dovan la vyèrz noir avèk son zanfan shové mayé é èl té apré koupe lo bann pti mayaz. Mwin la dmann aèl pou kossa èl i fé sa.Son réponss ? Mon famiye i sar pi la shapèl donk mi mète l’afèr dann la min la vyèrz noir. La suite mi koné pa vi ké mwin la vi aèl in sèl kou mé mi di an mwin mèm akoz sa i marshré pa ?

I bonpé i sava la shapèl pou okipe l’afèr d’shové amayé. Kissoi pou raz la tète lo marmaye Kikssoi pou koupe bann ti bouklète. Pou zot par zot i pé fé konm zot kèr i di azot.

Alé ! mi kite azot assime lo problèm konm zot i vé é ni rotrouv pli dvan, sipétadyé.