« Mon péi lé zoli »

Zistwar Tikok, par Christian Fontaine… zistwar an kréol dann Témoignages -1-

12 octob, sanm Christian Fontaine

Bann gramoun l’apo ropozé. Tikok i lès azot, i avaz pa. Ali osi, li la parti trankilman sou gro pié longani, la alonz desi in goni, la fé sanblan dormi. Soman, konm somèy té i vien pa, li la parti kal ali èk le pié panplomous a-koté (in pié panplomous in-pé panshé). Eksa, le dé min déyer son tèt, li ogard, li rèv.

Komansman moi d’avriy, desi l’ kou d’midi-in-èr, solèy i tap ankor an-lèr la kaz bondié. Tazantan in ti van fré i lèv, i vien, i forsi desi lo féso, i anvoy féso-la o-diab. Lo van i port, ansanm lodèr flèr panplomous, lodèr sitronel aou, pavoyé aou. I fane-fane tout sa desi somin. Lo né Tikok i kart po lès lo pasaz. Son zié i ferm tousèl po respir tout sa an dos-minos.

Détroi minit apré, Tikok i rouvèr son zié, i ogard : dovan li, in vié pié lila i pèt anflèr. I fé mazine ali la tèt défin granpèr Bouloun, avan li mor. Granpèr té ankor gayar, bien fré, mé son shové té fine blan konm flèr margozié-la ! Par déyer, kont lantouraz i sépar la kour bann Biganbé ek sad bann Morel, na in méné boi-blan : malgré son non, lo boi lé gri, lo fèy lé vèr-blé (kaziman noir), lo kèr lé blan-roz. I rosanm bann ti marmay desi le ran lékol maternel : na tout koulèr. Dann zot linz nèv, zot i shant, zot lé fièr.

Depi la kaz ziska somin : partèr Madanm Biganbé ! La, adémié pa kozé, i fo nir oir pito. Na zerbra, géldélou, margrit, roz, dalia, tout mélanzé ansanm ! Soman bann koulèr-la lé si telman bien aranzé… ! Konmsa mèm Tikok i mazine lo sièl, lo sièl sak lo prèt i koz desi lotèl-la…

Tikok i arfèrm lo zié. Li armazine tout sa-la. Po ansèv son bonèr, an minm tan, li antan la mizik bann moino, kardinal, tourtrel… Tousala i gazouy dann son zorèy, dann son kèr.

Tikok i antann tousala. Son kèr ali osi i sant ; son romans i di : « Mon péi lé zoli… zoli… zoli ! Fatig p’ali ! Fé viv ali ! »