Pou kossa banna la tyé lo shien bann shagossien ?

Biensir momandoné nou la parl lo gazaz lo shien bann shagossien é in marmaye douzan par-la la poz in késtyon é késtyon-la lété sak mwin la : marke an-o la. Pou kossa la tyé lo shien banna ? Mi oi plizyèr rézon é okin rézon i pé zète konsidéré konm valab.

Promyé rézon bann shagossien l’avé bann ti shien roké é bann solda anglé épi amérikin l’avé bann bèl-bèl chien d’rass é banna — sak téi komann biensir — téi vé pa lo bann rass i mélanj. Zot téi vé pa non pli bannroké i done la maladi zot shien d’rass.

Néna in rézon é sète-la sé pou fé pèr bann zabitan Diégo Garcia pars konm té fine déssidé déporte azot-mé zot téi koné pa ankor ! — téi falé fé pèr azot. Lé sir in pé la mazine, kan zot la vi sa, zordi sé noute shien é domin sé pétète nou.. La pa manké, kan la di azot kite Diégo pou alé dsu lé z’ot zil zot la parti san rézisté.

Astèr koman la tyé bann shien ? La komanss par tir fizi dsi zot mé té pa éfikass. Aprésa la sèye bril azot avèk dofé, mé rannman té pa bon. Pou finir lo nové lo gouvèrnèr Shagoss la désside fèrm azot dann kalorifère — in landroi i bril la paye koko — épi mète an marsh dê motèr panhard pou gaz azot é sète-la la marshé malorozman.

Laba Perhos Banos i fé parti galman bannzil Shagos la tyé bann shien galman mé lé bril lo bann shien é d’apré sak mwin la lir in garsson Lisette Talate — in drizante shagossienne — kan li la vi sa li la pèrde kaziman la tète épi li lé mor laba Maurice.

Mé si ni rapèl in pé bann zimaz dsi Chagos, nou la vi foto in landroi i antèr bann shien bann zanglé épi bann zamérikin. Kaziman in simétyèr sink étoil avèk bann tonb bien antréténi épi lo nom bann zanimo é toussa prop, prop, prop konm pa possib.

A bon antandèr salu !

Justin